 Уште еден апсурд: СДСМ е единствена опозициска партија во Европа, која рекла дека е против предвремени избори. По нивната логика, Владата на Груевски е совршена и за се што кажале против неа, ни самите не верувале. Ако пак СДСМ верува во тоа што го зборува, нека излезат на избори и нека го проверат.
ДУИ вчера поднесе иницијатива за распуштање на Собранието и одржување предвремени парламентарни избори. Тие сметаат дека актуелната влада нема капацитет, ниту пак мандат да ја извлече Македонија од кризата, по грчкото вето за влез на земјава во НАТО.
- Сите процеси како решавањето на несогласувањата со Грција, исполнувањето на политичките критериуми и европската агенда бараат ангажирање и функционирање на институциите со полн капацитет. Бидејќи овие работи во Македонија недостасуваат и земајќи ја предвид општата политичка состојба во земјата, ДУИ се залага за распуштање на Собранието и за предвремени избори, стои во образложението. Кај владејачката ВМРО-ДПМНЕ постои расположение за предвремени избори, иако конечната одлуката вчеравечер требаше да ја донесе претседателството на партијата. Во најголемата владејачка партија сметаат дека за носење нови одлуки, по Букурешт е потребно ново, стабилно мнозинство во парламентот, кое ќе има мандат за носење нови одлуки. Со тоа, Македонија за прв пат ќе го искористи демократскиот принцип за вонредни избори кога власта по своја волја сака да се провери кај народот. Државата ја чекаат тешки предизвици: преговори со Грција и НАТО, преговори за ЕУ, одлуки по независноста на Косово... За ова мора да се има стабилно мнозинство во Парламентот за да се знае кој ги носел одлуките и чија е заслугата или одговорноста за нив. Во моментов кај владините коалиционери постојат суштински разлики. Од една страна, се наоѓаат Лидерот на НСДП Тито Петковски и либералот Стојан Андов, кои бараат промена на името на државата без претходно да знаат кое е тоа име. Од друга страна се ВМРО-ДПМНЕ и останатите партнери во власта, кои се против тоа. На тој начин ВМРО-ДПМНЕ е уценета, што не е добра позиција за преговори околу името.
И во ДПА вчера требаше да заседава претседателството на партијата, иако и тие претходно најавија дека начелно немаат ништо против вонредни избори. За разлика од власта, најголемата опозициска партија остро се спротивстави на иницијативата на ДУИ за распуштање на парламентот. Според нив, ако сега има избори, Македонија ќе ја загуби поддршката од САД во продолжување на преговорите со Грција, со што ќе ја испушти шансата не само за покана од НАТО, туку и за добивање датум за преговори со ЕУ на есен. - Изборите во овој момент се бегање од одговорност за да можат политичарите да тактизираат, а Македонија да тоне во неизвесност. Во следните 6-8 месеци, Македонија не смее да губи време, а потоа предвремените избори се неопходност, вели Радмила Шекеринска, лидер на СДСМ. Најголемата опозициска партија бара итна собраниска седница на која Владата ќе треба да каже што по поразот во Букурешт, дали и како планира да ги продолжи преговорите со Грција или ќе се прости од европските и евроатланските интеграции. Ако Владата нема европски план за Македонија, СДСМ ќе бара формирање техничка или експертска влада, или пак широка коалиција. Шекеринска, сепак, не кажа како Македонија да ги продолжи разговорите со Грција, која е црвената линија за евентуален компромис, односно кое име би било прифатливо за нив.
- Ќе биде погубно доколку почнеме да лицитираме со имиња. Треба да изградиме заеднички став за кои точки можеме да постигнеме договор со Грција, вели Шекеринска. Помалите опозициски партии го поддржуваат ставот на СДСМ дека во моментив не треба да има вонредни избори. Или предвремени избори или преговори за актуелните прашања од кои зависи влезот во НАТО алијансата и Европската Унија. Ова е неофицијално ставот на Кабинетот на претседателот Бранко Црвенковски. Оттаму, најверојатно ќе се залагаат претседателските, локалните и парламентарните избори да се одржат на исти датум. Неофицијално, така ќе се намалел трошокот на избори, ќе се влијае на процентот на излезеност на гласање бидејќи со години тој стагнирал. Се бара решение за употреба на албанскиот јазик
Работните групи на ВМРО-ДПМНЕ и на ДПА вчера разговараа за прашањето за употреба на јазиците на припадниците на заедниците, поточно албанскиот. Од двете партии укажуваат дека постојат разлики за тоа како да се регулира ова прашање, но додаваат постои отворена дискусија што води кон договор. Од двете партии потенцираат дека решението ќе се бара во рамките на постојниот текст на Уставот.
-Разлики постојат околу ова прашање, меѓутоа решението ќе се бара во рамките на Уставот и Рамковниот договор, ако воопшто постои, изјави Коце Трајановски, член на извршен комитет на ВМРО-ДПМНЕ. На прашањето дали има рок до кога треба да се изнајде решение за употребата на јазиците, претставниците на двете партии велат дека не треба да се избрзува со решенија. Според Бесим Догани од ДПА станува збор за проблем што постои одамна. Но тоа не е ниту вина на ДПА, ниту на ВМРО-ДПМНЕ, изјави Догани кој додаде дека решението се бара во рамките на уставот според кој албанскиот е официјален јазик.
|
Од наредната година работниците ќе добиваат бруто-плата. Хранарината и превозот ќе се укина...
