|
Унгарија е најпривлечната земја од Централна и Источна Европа за инвеститорите на ризичен и приватен капитал, покажуваат резултатите од истражувањето на Институтот по менаџмент кон Универзитетот во шпанскиот град Навара и компанијата „Стратеџик капитал менаџмент“.
Според истражувањето, Унгарија е прва на оваа листа поради поволните даночни услови, стабилната економија, ниската инфлација и развиената индустрија. По Унгарија следат Словенија, балтичките земји и Полска, а на последните места се Бугарија, Романија и Словачка. Во истражувањето се анализираат можностите за инвестирање, обемот на пазарот, прогнозите за економски раст, пазарот на капитал, даночните услови и претприемачкиот дух на населението во земјите од Источна Европа. Резултатите се споредени со економската реалност во првите 15 земји-членки на ЕУ, при што е изведен просечен показател со вредност 100. Според добиените резултати првото место од сите земји од ЕУ го зазема Ирска со 130 бода, потоа е Луксембург со 127, а на третото место е Велика Британија со 124. Кај балтичките држави показателот е 93, а општо во зоната на Централна и Источна Европа 85. На последно место е Грција со 69 бода. Како целина земјите од Централна и Источна Европа се помалку привлечни од првите 15 земји-членки на Унијата во однос на инвестициите. Во нив бруто-домашниот производ по глава на жител е помал и најверојатно ќе им бидат потребни неколку децении за да го надминат задоцнувањето, се вели во истражувањето. Сепак, некои од овие земји се поместени понапред на листата од другите европски држави. На пример, Унгарија и Словенија се пред Франција, а средната вредност за земјите од Централна и Источна Европа е повисока од онаа за Шпанија и Италија.
|
„Мора да знаеме сите, и тоа го потенцираме, дека Македонија нема друга иднина освен целосн...
