|
Британскиот премиер Гордон Браун продолжува да ја губи поддршката на домашните гласачи и неполни четири месеци по влегувањето во „Даунинг стрит 10“, бележи најнизок рејтинг откако го наследи Тони Блер, покажува анкета на „Сандеј Тајмс“. Според резултатите од испитувањето на јавното мислење, само 33% од Британците мислат дека Браун добро ја извршува функцијата, а 43% дека лошо ја извршува функцијата премиер, што е различно од показателите од пред еден месец, кога речиси 60% од гласачите се согласуваа дека добро работи.
Брзиот пад на неговиот личен рејтинг е проследен и со паѓањето на поддршката на лабуристичката партија. Лабуристите, кои по промената на врвот од партијата, на крајот од јуни направија голема предност пред главните политички противници ториевците, сега продолжуваат да бележат пад на поддршката од домашните гласачи. Ако сега би се одржале избори, конзервативците би добиле 41% од гласовите, лабуристите би биле втори со поддршка од 35%, што претставува намалување за три отсто во споредба со минатиот месец, додека либералдемократите би имале само 13% од гласовите на британците. Продолжување на падот на поддршката на Браун и на неговите лабуристи доаѓа по навестувањата дека британската економија може да влезе во период на нестабилност, како и по проблемите со изјавите на министрите и на владини функционери во јавноста, што беа пречекани со потсмев и критики. Министерот за безбедносни прашања лордот Вест, откажа едно ТВ интервју, откако беше исмеан што во рок од еден час даде две спротивставени изјави за предлогот на Владата за продолжениот притвор за осомничени за тероризам, откако во меѓувреме разговараше со премиерот Браун. Британскиот премиер падна во немилост кај гласачите по „кукавичлакот“ со предвремените избори, по манипулацијата со јавноста, како и по обвинувањето дека ги „украл“ идеите на ториевците за Законот за наследни такси.
|
Спорот за името и уставното име на Македонија не се споменати во изборната програма на амери...
