 Во Македонија имаше неколку иницијативи за легализација на проституцијата, кои завршија со неуспех. Неодамна е отворен Центар за сексуални работници. Нашата Дијана Ристова го посети Центарот за сексуални работници во неработно време, односно кога не се присутни лицата кои нудат сексуални услуги за пари или материјален надомест.
Катерина Партинова, социјален работник во центарот, вели дека овие лица имаат недоверба кон медиумите:-„Некои од девојките имаат дадено изјави, со тоа што им е кажано дека нема да се гледа ликот и дека ќе биде променет гласот. Меѓутоа, има случаи кога не е променет гласот, а девојката е снимена во профил или од назад, но сепак се познава која е. Девојките се изманипулирани со тоа што им се даваат средства за да зборуваат." Центарот за сексуални работници е отворен со средства од Глобалниот фонд за борба против ХИВ и СИДА. Центарот има неколку простории. Опремен е со туш - кабини и машини за перење, има кујна и дневен простор. Во центарот за сексуални работници не се врши никаква нелегална работа, вели Силвана Наумова, координатор на центарот. Подобри услови за живот Тука доаѓаат лица кои живеат во многу лоши услови. -„Можат да се тушираат, да перат алишта, да јадат, но има и други активности“, уверува Наумова : -„Два пати неделно во центарот има правен советник, кој дава правни совети, секоја среда доаѓа стилист, тоа е ден за разубавување, а еднаш неделно имаме едукативни работилници". Марија Тошева, од невладината организација ХОБС e раководител на програмата за поддршка на сексуални работници. Таа вели дека волонтери на ХОБС веќе седум години работат на терен со сексуалните работници: -„Воздраста е најразлична од 14, 15 години па се’ до 60, 70 години. Машката сексуална работа оди рамо до рамо се женската сексуална работа. Можеби трпат и малку поголема стигма и дискриминација, особено оние мажи кои нудат сексуални услуги на мажи, поради третманот на хомосексуалноста во нашите општества, меѓутоа тука сепак ги има." Реакции Тие работат и со членови на нивните семејства. Во некои семејста лицата кои нудат сексуални услуги се прифатени и тоа им е единствен извор за егзистенција, а во други се осудувани и се жртви на насилство. Каков е ставот на невладината ХОБС за легализација на проституцијата? Марија Тошева: -„Овој проблем мора некако да се регулира, бидејќи моменталната ситуација е алармантна и загрижувачка. Во која насока ќе се движиме е работа на поширок дијалог. Значи тука треба да бидат вклучени повеќе страни, меѓу кои што апсолутно сметам дека и сексуалните работници треба да бидат слушнати, за да се донесе заеднички став на државата, на општеството" - вели Тошева.
|
Од наредната година работниците ќе добиваат бруто-плата. Хранарината и превозот ќе се укина...
