 Поголема контрола на охридските плажи за летово најавува Комисијата која ги даваше под закуп плажите на охридското крајбрежје. Од Министерството за транспорт и врски, чиј претставници се дел од Комисијата, велат дека преку контроли ќе утврдат дали закупците на плажите, просторот за сончање го уредиле по европски терк, дали имаат служби за спасување и дали капачите се заштитени од скутери и глисери. Ако не се почитува договореното, од Министерството нагласуваат дека прво ќе се опоменуваат закупците за да се отстранат недостатоците, по што ќе следи раскинување на договорите.
Условите на плажите кои се пропишани треба да го подигнат нивото на туристичките услуги во земјава, што е основна цел за привлекување на поголем број посетители од земјава и од странство. Од Министерството појаснуваат дека според стандардите од 40 до 60 проценти од просторот на плажата треба да бидат слободни за користење, без лежалки и без други реквизити. Задолжително е да се обезбеди и служба за спасување, а местото за седење на спасителот да биде поставено на височина од минимум 2,5 метри. Закупците особено се должни да го обележат просторот за капење во езерото со таканаречени бови, со што капачите ќе бидат заштитени од пловните објекти. На плажата треба да се постават и информативни паноа, безжичен интернет, но и да се постави часовник на видливо место. Организирано треба да биде и одржувањето на хигиената, а плажите соодветно да биде попесочена. На овој простор треба да биде застапено и зеленило, да има клупи, фонтани за питка вода, детски игралишта и пешачки патеки.
- Во рамките на сервисниот пункт треба да има шанк со кабина за музика, место за озвучување, санитарен јазол, тушеви, соблекувални, простор за оставање за чадори и лежалки и други реквизити - велат од ресорното министерство. Тие укажуваат дека чадорите за сонце и лежалките можат да се изнајмуваат по ценовник кој ќе биде објавен на видно место на плажата.
|
Пожарот кај местото Коџа Чаир на планината Беласица се уште е активен и е проширен заради си...
