 Францускиот министер за надворешни работи, Бернард Кушнер, предизвика гнев кај ирските политичари со предупредувањето дека и самите тие ќе настрадаат, ако на утрешниот референдум во Ирска биде отфрлен Лисабонскиот договор, пишува денеска францускиот весник „Фигаро“.
Според весникот, Кушнер без да сака стана најдобриот сојузник на ирските противници на Лисабонскиот договор. „Фигаро“ коментира дека шефот на француската дипломатија ги насочи врз себе сите критики на ирската политичка елита по заканувачката изјава во понеделникот за тоа што ќе се случи ако Ирска одговори со „не“ на референдумот за Лисабонскиот договор. „Првите жртви ќе бидат Ирците. Тие ги користеа европските субвенции повеќе од останатите. Ќе биде многу вознемирувачки ако не можеме да сметаме на Ирците, кои од друга страна многу сметаа на Европа. Ирците со тоа сами ќе се казнат. За да ги развиваат компаниите, кои се во експанзија откако се во срцето на Европа, треба и Европа да се развива“, изјави Кушнер за радио „Ер-Те-Ел“. „Фигаро“ наведува дека предупредувањето на шефот на француската дипломатија воопшто не било „по вкусот на Даблин“, особено во момент кога според анкетите одговорите „да“ и „не“ се речиси еднакви по процентите. „Изјавата на Бернард Кушнер може да доведе до непосакуван резултат. Тој требаше да си ја гледа својата работа. Во Ирска сме докажале дека можеме сами да донесеме решенија“, изјави ирскиот министер за здравство Мели Харни. „Изјавата на Кушнер е зајадлива и арогантна. Доколку ни се заканува дека ќе бидеме казнети, кога се уште ништо не е решено, тогаш што ни се подготвува кога Французите ќе го преземат претседателството со ЕУ на први јули“, нагласи независниот пратеник Шејн Рос, кој е еден од ретките ирски пратеници што соопштија дека се против Лисабонскиот договор. Според „Фигаро“, изјавата на Кушнер ги натера некои од ирските гласачи кои се двоумеа да решат да гласаат со „не“ на утрешниот референдум. Треба да признаам дека зборовите на тој Французин навистина ме дразнат. Претходно се колебав, но сега ќе гласам со „не“, пишува еден читател на сајтот на ирскиот весник „Ајриш индепендент“.
|
„Мора да знаеме сите, и тоа го потенцираме, дека Македонија нема друга иднина освен целосн...
