Реформите во здравството ги потиснуваат педијатрите. Со промените тие ќе бидат заменети со семејните лекари, а за неколку години во Македонија ќе ги нема. Младите доктори се повеќе ја заобиколуваат оваа специјализација. Во последните 10 години нивниот број е драстично намален. Просечната старост на овие лекари кај нас е 52 години. „Оној момент кога државата ќе види негативни трендови и оној момент кога ќе ни падне степенот на вакцинација, кога ќе се вратат болестите кои веќе се превентивни. Ако се врати маларијата, тогаш ќе биде можеби доцна“, изјави Љупчо Николовски, претседател на Здружение на педијатри. Според европските правила еден доктор треба во просек да има 500 деца. Во некои делови во земјава еден педијатар се грижи за 2.000 деца.

Последниот предлог на медијаторот Нимиц, по синоќешниот детален брифинг од страна на преговарачот Димитров, државниот врв го смета за конечен, но консултациите околу неговото изјаснување ќе продолжат деновиве, заклучно со собраниската седница во понеделник, изјави по лидерската средба министерот Милошоски. „Овој предлог го сметаме, после 15 години разговори околу овој билатерален спор, за конечен предлог во овој процес. И вториот заклучок е дека процесот на градење став во однос на овој конечен предлог, продолжува овие денови и најверојатно според Уставот и Законите ќе резултира со собраниска расправа во понеделник“, изјави Милошоски.

55-годишната Горка Трајкова изгорела во пожарот што ноќеска избувнал во нејзината барака на улицата „Плачковица“ во Радовиш. Трагедијата се случила околу 1 часот по полноќ. Трајкова била сама во куќата. Соседите, кои први го забележале пожарот, веднаш ја известиле противпожарната единица, но поради силината на огнот, чии пламени јазици достигнувале висина и до пет метра, било невозможно да и се помогне. „Ние не можевме да ја извадиме, имаше многу оган и ништо не спасија“, изјави Методиј Јованов, сосед.

Малиот Леон се врати од Брисел, каде во болницата „Сент Лук“ му беше извршена трансплантација на црниот дроб. Операцијата, која траеше 9 часа, во ноември минатата година ја изведе тим од лекари на чело со познатиот д-р Рајмонд Рединг и двајца македонски хирурзи. Во болницата во Брисел остана цели четири месеца. Три и полгодишниот Леон сега има нов живот. Не пречека пред својот дом во скопско Марино, заедно со сестричката Симона, возбуден што се повторно заедно. Неговата мајка Анета му подари дел од нејзиниот црн дроб. Оваа млада жена со солзи во очите раскажува за деновите поминати по болниците, честите трансфузии на крв, болките, крварењата, кои се веќе минато.

Новиот предлог има елементи на стари, претходно дадени предлози. За разлика од средбите во Виена и Атина кога Нимиц даде повеќе различни предлози, сега медијаторот на преговарачите им дал еден предлог кој, според него, е фер, чесен и разумен. Нема временски лимит за одговор во ОН но, поради самитот на НАТО и грчките закани, Нимиц се надева на брз одговор. Тој останува во контакт со Василакис и Димитров и доколку има позитивни реакции за предлогот што уште не се прецизира, подготвен е за нови средби.